ਜਲੰਧਰ:TLT NEWS/ ਅਲਾਸਕਾ ਚੌਕ ’ਚ ਦੋ ਦਿਨ ਪਹਿਲਾਂ ਨਿੱਜੀ ਕਰਤਾਰ ਬੱਸ ਦੀ ਲਪੇਟ ’ਚ ਆਉਣ ਕਾਰਨ ਡਿਲਿਵਰੀ ਬੁਆਏ ਦੀ ਮੌਤ ਤੋਂ ਬਾਅਦ ਜਲੰਧਰ ਦੀਆਂ ਸੜਕਾਂ ’ਤੇ ਦੌੜ ਰਹੀਆਂ ਨਿੱਜੀ ਬੱਸਾਂ ਦੀ ਫਿਟਨੈੱਸ ਨੂੰ ਲੈ ਕੇ ਗੰਭੀਰ ਸਵਾਲ ਖੜ੍ਹੇ ਹੋ ਗਏ ਹਨ। ਜਾਣਕਾਰੀ ਮੁਤਾਬਕ ਜਿਸ ਕਰਤਾਰ ਬੱਸ ਦੀ ਲਪੇਟ ’ਚ ਆ ਕੇ ਡਿਲਿਵਰੀ ਬੁਆਏ ਦੀ ਮੌਤ ਹੋਈ, ਉਸ ਦੀ ਫਿਟਨੈੱਸ ਐਕਸਪਾਇਰ ਹੋਣ ਦੀ ਗੱਲ ਵੀ ਸਾਹਮਣੇ ਆ ਰਹੀ ਹੈ। ਹਾਲਾਂਕਿ ਇਸ ਦੀ ਅਧਿਕਾਰਤ ਪੁਸ਼ਟੀ ਟਰਾਂਸਪੋਰਟ ਵਿਭਾਗ ਦੇ ਰਿਕਾਰਡ ਤੋਂ ਹੋਣੀ ਬਾਕੀ ਹੈ।
ਜੇਕਰ ਬੱਸ ਦੀ ਫਿਟਨੈੱਸ ਸੱਚਮੁੱਚ ਮਿਆਦ ਪੁੱਗ ਚੁੱਕੀ ਸੀ ਤਾਂ ਇਹ ਮਾਮਲਾ ਸਿਰਫ਼ ਸੜਕ ਹਾਦਸੇ ਤੱਕ ਸੀਮਤ ਨਹੀਂ ਰਹਿੰਦਾ, ਸਗੋਂ ਟਰਾਂਸਪੋਰਟ ਵਿਭਾਗ ਦੀ ਨਿਗਰਾਨੀ ਅਤੇ ਸੜਕ ਸੁਰੱਖਿਆ ਪ੍ਰਬੰਧਾਂ ’ਤੇ ਵੀ ਸਵਾਲ ਖੜ੍ਹੇ ਕਰਦਾ ਹੈ।
ਬੱਸ ਦੀ ਫਿਟਨੈੱਸ ਕਿਸ ਨੇ ਕੀਤੀ ਚੈੱਕ?
ਸੈਂਕੜੇ ਯਾਤਰੀਆਂ ਨੂੰ ਲੈ ਕੇ ਸੜਕਾਂ ’ਤੇ ਚੱਲਣ ਵਾਲੀ ਬੱਸ ਲਈ ਫਿਟਨੈੱਸ ਸਰਟੀਫਿਕੇਟ ਬੇਹੱਦ ਜ਼ਰੂਰੀ ਹੁੰਦਾ ਹੈ। ਇਸ ਦਾ ਮਕਸਦ ਇਹ ਯਕੀਨੀ ਬਣਾਉਣਾ ਹੈ ਕਿ ਵਾਹਨ ਸੜਕ ’ਤੇ ਚਲਾਉਣ ਦੇ ਯੋਗ ਹੈ। ਅਜਿਹੇ ’ਚ ਸਵਾਲ ਹੈ ਕਿ ਜੇਕਰ ਬੱਸ ਦੀ ਫਿਟਨੈੱਸ ਖਤਮ ਹੋ ਚੁੱਕੀ ਸੀ ਤਾਂ ਉਹ ਸੜਕ ’ਤੇ ਕਿਵੇਂ ਚੱਲ ਰਹੀ ਸੀ?
ਕੀ ਬੱਸ ਦਾ ਰੂਟ ਪਰਮਿਟ ਵੈਧ ਸੀ? ਕੀ ਟੈਕਸ ਅਤੇ ਬੀਮਾ ਦਸਤਾਵੇਜ਼ ਪੂਰੇ ਸਨ? ਸਭ ਤੋਂ ਵੱਡਾ ਸਵਾਲ ਇਹ ਹੈ ਕਿ ਫਿਟਨੈੱਸ ਦੀ ਜਾਂਚ ਲਈ ਟਰਾਂਸਪੋਰਟ ਵਿਭਾਗ ਵੱਲੋਂ ਕੀ ਕਾਰਵਾਈ ਕੀਤੀ ਗਈ ਸੀ?
ਕੈਗ ਦੀ ਰਿਪੋਰਟ ’ਚ ਵੀ ਉੱਠ ਚੁੱਕੇ ਹਨ ਸਵਾਲ
ਮਾਮਲਾ ਇਸ ਲਈ ਵੀ ਗੰਭੀਰ ਹੈ ਕਿਉਂਕਿ ਕੰਟਰੋਲਰ ਐਂਡ ਆਡੀਟਰ ਜਨਰਲ (CAG) ਦੀ ਰਿਪੋਰਟ ’ਚ ਜਲੰਧਰ ਸਮੇਤ ਕੁਝ ਇਲਾਕਿਆਂ ’ਚ ਫਿਟਨੈੱਸ ਐਕਸਪਾਇਰ ਵਾਹਨਾਂ ਦੀ ਨਿਗਰਾਨੀ ’ਚ ਖਾਮੀਆਂ ਦਾ ਜ਼ਿਕਰ ਕੀਤਾ ਗਿਆ ਸੀ। ਰਿਪੋਰਟ ਮੁਤਾਬਕ ਜਲੰਧਰ ਨਾਲ ਸਬੰਧਤ 3,330 ਵਾਹਨਾਂ ਦੇ ਫਿਟਨੈੱਸ ਸਰਟੀਫਿਕੇਟ ਐਕਸਪਾਇਰ ਪਾਏ ਗਏ ਸਨ।
ਹੁਣ ਅਲਾਸਕਾ ਚੌਕ ਹਾਦਸੇ ਤੋਂ ਬਾਅਦ ਇਹ ਸਵਾਲ ਹੋਰ ਗੰਭੀਰ ਹੋ ਗਿਆ ਹੈ ਕਿ ਜਲੰਧਰ ’ਚ ਨਿੱਜੀ ਬੱਸਾਂ ਦੀ ਫਿਟਨੈੱਸ ਦੀ ਜਾਂਚ ਕਿੰਨੀ ਸਖ਼ਤੀ ਨਾਲ ਕੀਤੀ ਜਾ ਰਹੀ ਹੈ।
ਕੀ ਹਾਦਸੇ ਤੋਂ ਬਾਅਦ ਹੋਵੇਗੀ ਸਪੈਸ਼ਲ ਚੈਕਿੰਗ?
ਹਾਦਸੇ ਤੋਂ ਬਾਅਦ ਟਰਾਂਸਪੋਰਟ ਵਿਭਾਗ ਵੱਲੋਂ ਸ਼ਹਿਰ ਦੀਆਂ ਸਾਰੀਆਂ ਨਿੱਜੀ ਬੱਸਾਂ ਦੀ ਫਿਟਨੈੱਸ, ਰੂਟ ਪਰਮਿਟ, ਟੈਕਸ, ਬੀਮਾ ਅਤੇ ਹੋਰ ਦਸਤਾਵੇਜ਼ਾਂ ਦੀ ਵਿਸ਼ੇਸ਼ ਜਾਂਚ ਕੀਤੇ ਜਾਣ ਦੀ ਮੰਗ ਉੱਠ ਰਹੀ ਹੈ। ਖ਼ਾਸ ਕਰਕੇ ਭੀੜ-ਭੜੱਕੇ ਵਾਲੀਆਂ ਸੜਕਾਂ ਅਤੇ ਪ੍ਰਮੁੱਖ ਚੌਕਾਂ ’ਚੋਂ ਲੰਘਣ ਵਾਲੀਆਂ ਬੱਸਾਂ ਦੀ ਜਾਂਚ ਜ਼ਰੂਰੀ ਮੰਨੀ ਜਾ ਰਹੀ ਹੈ।
ਜਨਤਾ ਦੀ ਸੁਰੱਖਿਆ ਜਾਂ ਕਾਗਜ਼ਾਂ ਦਾ ਖੇਡ?
ਸਭ ਤੋਂ ਵੱਡਾ ਸਵਾਲ ਇਹ ਹੈ ਕਿ ਜੇਕਰ ਫਿਟਨੈੱਸ ਐਕਸਪਾਇਰ ਵਾਹਨ ਸੜਕ ’ਤੇ ਚੱਲਦਾ ਮਿਲਦਾ ਹੈ ਤਾਂ ਇਸ ਦੀ ਜ਼ਿੰਮੇਵਾਰੀ ਕਿਸ ਦੀ ਹੋਵੇਗੀ—ਬੱਸ ਮਾਲਕ, ਡਰਾਈਵਰ ਜਾਂ ਉਹ ਸਿਸਟਮ ਜਿਸ ਦੀ ਨਿਗਰਾਨੀ ਹੇਠ ਵਾਹਨ ਸੜਕਾਂ ’ਤੇ ਚੱਲ ਰਹੇ ਹਨ?
ਅਲਾਸਕਾ ਚੌਕ ਹਾਦਸੇ ’ਚ ਇਕ ਪਰਿਵਾਰ ਨੇ ਆਪਣਾ ਮੈਂਬਰ ਗੁਆ ਦਿੱਤਾ ਹੈ। ਹੁਣ ਲੋੜ ਹੈ ਕਿ ਜਾਂਚ ਰਾਹੀਂ ਇਹ ਸਪੱਸ਼ਟ ਕੀਤਾ ਜਾਵੇ ਕਿ ਹਾਦਸੇ ਵਾਲੀ ਬੱਸ ਦੀ ਫਿਟਨੈੱਸ ਕਦੋਂ ਤੱਕ ਵੈਧ ਸੀ, ਕਦੋਂ ਐਕਸਪਾਇਰ ਹੋਈ ਅਤੇ ਜੇਕਰ ਮਿਆਦ ਖਤਮ ਹੋ ਚੁੱਕੀ ਸੀ ਤਾਂ ਬੱਸ ਸੜਕ ’ਤੇ ਕਿਵੇਂ ਚੱਲ ਰਹੀ ਸੀ।
15 ਸਾਲ ਤੋਂ ਪੁਰਾਣੀਆਂ ਬੱਸਾਂ ਦੀ ਫਿਟਨੈੱਸ ਕਿੰਨੀ ਵਾਰ?
- 8 ਸਾਲ ਤੱਕ ਪੁਰਾਣਾ ਟਰਾਂਸਪੋਰਟ ਵਾਹਨ: ਫਿਟਨੈੱਸ ਆਮ ਤੌਰ ’ਤੇ 2 ਸਾਲ ਲਈ।
- 8 ਤੋਂ 15 ਸਾਲ ਤੱਕ ਪੁਰਾਣਾ ਵਾਹਨ: ਹਰ ਸਾਲ ਫਿਟਨੈੱਸ ਕਰਵਾਉਣੀ ਪੈਂਦੀ ਹੈ।
- 15 ਸਾਲ ਤੋਂ ਵੱਧ ਪੁਰਾਣਾ ਟਰਾਂਸਪੋਰਟ ਵਾਹਨ: ਹਰ 6 ਮਹੀਨੇ ਬਾਅਦ ਫਿਟਨੈੱਸ ਸਰਟੀਫਿਕੇਟ ਦਾ ਨਵੀਨੀਕਰਨ ਕਰਵਾਉਣਾ ਪੈਂਦਾ ਹੈ।
ਹੁਣ ਜਾਂਚ ਦਾ ਕੇਂਦਰ ਇਹ ਰਹੇਗਾ ਕਿ ਹਾਦਸੇ ਵਾਲੀ ਬੱਸ ਦੀ ਆਖਰੀ ਫਿਟਨੈੱਸ ਕਦੋਂ ਹੋਈ ਸੀ ਅਤੇ ਹਾਦਸੇ ਵਾਲੇ ਦਿਨ ਉਹ ਵੈਧ ਸੀ ਜਾਂ ਨਹੀਂ।
‘ਸਿਰਫ਼ ਕਰਤਾਰ ਬੱਸਾਂ ਨੂੰ ਨੋ-ਐਂਟਰੀ ਜ਼ੋਨ ’ਚ ਇਜਾਜ਼ਤ’ : ਕੇਡੀ ਭੰਡਾਰੀ
ਭਾਜਪਾ ਦੇ ਸੀਨੀਅਰ ਆਗੂ ਕੇਡੀ ਭੰਡਾਰੀ ਨੇ ਕਿਹਾ ਕਿ ਕਰਤਾਰ ਬੱਸ ਨਾਲ ਵਾਪਰੇ ਹਾਦਸੇ ਨੇ ਬੱਸ ਮਾਲਕਾਂ ਅਤੇ ਸਬੰਧਤ ਵਿਭਾਗ ਦੀ ਕਾਰਗੁਜ਼ਾਰੀ ’ਤੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ। ਉਨ੍ਹਾਂ ਦਾਅਵਾ ਕੀਤਾ ਕਿ ਸ਼ਹਿਰ ਦੇ ਨੋ-ਐਂਟਰੀ ਜ਼ੋਨ ’ਚ ਆਮ ਤੌਰ ’ਤੇ ਹੋਰ ਵਾਹਨਾਂ ਨੂੰ ਦਾਖ਼ਲੇ ਦੀ ਇਜਾਜ਼ਤ ਨਹੀਂ ਹੁੰਦੀ, ਪਰ ਕਰਤਾਰ ਬੱਸਾਂ ਨੂੰ ਇੱਥੇ ਆਉਣ ਦੀ ਇਜਾਜ਼ਤ ਮਿਲੀ ਹੋਈ ਹੈ।
ਭੰਡਾਰੀ ਨੇ ਕਿਹਾ ਕਿ ਲੋਕਾਂ ’ਚ ਇਸ ਮਾਮਲੇ ਨੂੰ ਲੈ ਕੇ ਰੋਸ ਹੈ ਅਤੇ ਜਲਦ ਹੀ ਇਨ੍ਹਾਂ ਬੱਸਾਂ ਖ਼ਿਲਾਫ਼ ਮੋਰਚਾ ਖੋਲ੍ਹਿਆ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਸ਼ਹਿਰ ਦੀਆਂ ਸੜਕਾਂ ’ਤੇ ਲੋਕਾਂ ਦੀ ਸੁਰੱਖਿਆ ਨਾਲ ਕਿਸੇ ਵੀ ਕੀਮਤ ’ਤੇ ਸਮਝੌਤਾ ਨਹੀਂ ਹੋਣ ਦਿੱਤਾ ਜਾਵੇਗਾ।
More Stories
ਜਲੰਧਰ ਪ੍ਰੋਫੈਸ਼ਨਲ ਫੋਟੋਗ੍ਰਾਫਰਜ਼ ਐਸੋਸੀਏਸ਼ਨ ਨੇ ਮਨਾਇਆ ਫੋਟੋਗ੍ਰਾਫੀ ਦਿਵਸ,ਤਸਵੀਰਾਂ ਰਾਹੀਂ ਯਾਦਾਂ ਤੇ ਇਤਿਹਾਸ ਸੰਭਾਲਣ ਦਾ ਦਿੱਤਾ ਸੰਦੇਸ਼
ਅਧੂਰੀ ਸੀਵਰੇਜ ਲਾਈਨ ਦਾ ਕੰਮ ਜਲਦ ਮੁਕੰਮਲ ਕਰਨ ਦੀ ਮੰਗ, ਡਾ. ਜਸਲੀਨ ਸੇਠੀ ਨੇ ਦਿੱਤੀ ਚੱਕਾ ਜਾਮ ਦੀ ਚਿਤਾਵਨੀ
ਹੈਰੋਇਨ, ਨਾਜਾਇਜ਼ ਹਥਿਆਰਾਂ ਤੇ ਡਰੱਗ ਮਨੀ ਸਮੇਤ ਕਾਬੂ