ਮਹਿੰਗੀ ਹੋ ਸਕਦੀ ਹੈ ਲੰਬੀ ਦੂਰੀ ਦੀ ਰੇਲ ਯਾਤਰਾ, ਪਹਿਲੀ ਜੁਲਾਈ ਤੋਂ ਵਧ ਜਾਣਗੇ ਰੇਲ ਦੇ ਕਿਰਾਏ

ਸੂਤਰਾਂ ਮੁਤਾਬਕ ਰੇਲਵੇ ਬੋਰਡ ਨੇ ਗ਼ੈਰ ਮੇਲ ਤੇ ਐਕਸਪ੍ਰੈੱਸ ਰੇਲ ਗੱਡੀਆਂ ’ਚ ਸਾਰੀਆਂ ਸ਼੍ਰੇਣੀਆਂ ਦੇ ਕਿਰਾਏ ’ਚ ਇਕ ਪੈਸਾ ਪ੍ਰਤੀ ਕਿਲੋਮੀਟਰ ਤੇ ਏਸੀ ਕਲਾਸ ’ਚ ਦੋ ਪੈਸੇ ਪ੍ਰਤੀ ਕਿਲੋਮੀਟਰ ਕਿਰਾਇਆ ਵਾਧੇ ਦੀ ਤਜਵੀਜ਼ ਭੇਜੀ ਹੈ ਜਦਕਿ ਦੁਜੀ ਸ਼੍ਰੇਣੀ ’ਚ ਪੰਜ ਸੌ ਕਿਲੋਮੀਟਰ ਤੋਂ ਵੱਧ ਦੀ ਯਾਤਰਾ ’ਤੇ ਪ੍ਰਤੀ ਕਿਲੋਮੀਟਰ ਅੱਧਾ ਪੈਸਾ ਜ਼ਿਆਦਾ ਕਿਰਾਇਆ ਹੋਵੇਗਾ।

ਜੇਕਰ ਇਸ ਤਜਵੀਜ਼ ਨੂੰ ਰੇਲ ਮੰਤਰੀ ਅਸ਼ਵਨੀ ਵੈਸ਼ਣਵ ਦੀ ਮਨਜ਼ੂਰੀ ਮਿਲੀ ਤਾਂ ਏਸੀ ’ਚ ਇਕ ਹਜ਼ਾਰ ਕਿਮੀ ਦੇ ਸਫ਼ਰ ’ਤੇ 20 ਰੁਪਏ ਵੱਧ ਦੇਣੇ ਪੈਣਗੇ, ਜਦਕਿ ਏਨੀ ਦੂਰੀ ਲਈ ਨਾਨ ਏਸੀ ’ਚ 10 ਰੁਪਏ ਵੱਧ ਦੇਣੇ ਪੈਣਗੇ। ਇਸ ਹਿਸਾਬ ਨਾਲ ਦਿੱਲੀ ਤੋਂ ਕੋਲਕਾਤਾ ਜਾਂ ਮੁੰਬਈ ਦਾ ਸਫ਼ਰ ਹੁਣ ਕਰੀਬ 30 ਰੁਪਏ ਮਹਿੰਗਾ ਹੋ ਜਾਵੇਗਾ। ਇਸੇ ਤਰ੍ਹਾਂ 500 ਕਿਲੋਮੀਟਰ ਦੀ ਯਾਤਰਾ ’ਚ ਨਾਨ-ਏਸੀ ’ਚ ਪੰਜ ਰੁਪਏ ਤੇ ਏਸੀ ’ਚ ਦਸ ਰੁਪਏ ਜ਼ਿਆਦਾ ਕਿਰਾਇਆ ਦੇਣਾ ਪਵੇਗਾ। ਰੇਲ ਕਿਰਾਇਆ ਵਾਧੇ ਬਾਰੇ ਰੇਲਵੇ ਦੀ ਦਲੀਲ ਹੈ ਕਿ ਲਾਗਤ ’ਚ ਵਾਧਾ ਤੇ ਯਾਤਰੀਆਂ ’ਤੇ ਵਾਧੂ ਬੋਝ ਦਾ ਖਿਆਲ ਰੱਖਦਿਆਂ ਕਿਰਾਏ ’ਚ ਘੱਟ ਤੋਂ ਘੱਟ ਵਾਧਾ ਕੀਤਾ ਗਿਆ ਹੈ।