ਨਿਊਜ਼ੀਲੈਂਡ ਅਤੇ UK ਪਾਸਪੋਰਟ ਹੈ?  ਤਾਂ ਧਿਆਨ ਦਿਓ

ਦੋਹਰੀ ਨਾਗਰਿਕਤਾ ਵਾਲੇ ਯਾਤਰੀਆਂ ਲਈ ਯੂਕੇ ਦੇ ਨਿਯਮਾਂ ਵਿੱਚ ਵੱਡੀ ਤਬਦੀਲੀ: 25 ਫਰਵਰੀ 2026 ਤੋਂ ਨਵੇਂ ਕਾਨੂੰਨ ਲਾਗੂ
ਔਕਲੈਂਡ/TLT NEWS: – ਯੂਨਾਈਟਿਡ ਕਿੰਗਡਮ (UK) ਸਰਕਾਰ ਨੇ ਦੋਹਰੀ ਨਾਗਰਿਕਤਾ ਰੱਖਣ ਵਾਲੇ ਵਿਅਕਤੀਆਂ, ਖਾਸ ਕਰਕੇ ਨਿਊਜ਼ੀਲੈਂਡ ਦੇ ਵਸਨੀਕਾਂ ਲਈ ਯਾਤਰਾ ਨਿਯਮਾਂ ਵਿੱਚ ਇੱਕ ਅਹਿਮ ਬਦਲਾਅ ਦਾ ਐਲਾਨ ਕੀਤਾ ਹੈ। 25 ਫਰਵਰੀ 2026 ਤੋਂ ਲਾਗੂ ਹੋਣ ਵਾਲੇ ਇਹ ਨਿਯਮ ਉਨ੍ਹਾਂ ਸਾਰੇ ਯਾਤਰੀਆਂ ’ਤੇ ਅਸਰ ਪਾਉਣਗੇ ਜਿਨ੍ਹਾਂ ਕੋਲ ਬ੍ਰਿਟਿਸ਼ ਜਾਂ ਆਇਰਿਸ਼ ਨਾਗਰਿਕਤਾ ਦੇ ਨਾਲ-ਨਾਲ ਕਿਸੇ ਹੋਰ ਦੇਸ਼ ਦੀ ਨਾਗਰਿਕਤਾ ਵੀ ਹੈ।
ਹੁਣ ਇਲੈਕਟ੍ਰਾਨਿਕ ਟਰੈਵਲ ਆਥੋਰਾਈਜ਼ੇਸ਼ਨ-ਈ.ਟੀ.ਏ (ETA) ਦੀ ਵਰਤੋਂ ਨਹੀਂ ਕੀਤੀ ਜਾ ਸਕੇਗੀ
ਨਵੇਂ ਦਿਸ਼ਾ-ਨਿਰਦੇਸ਼ਾਂ ਅਨੁਸਾਰ, ਦੋਹਰੀ ਨਾਗਰਿਕਤਾ ਵਾਲੇ ਵਿਅਕਤੀ ਹੁਣ ਇਲੈਕਟ੍ਰਾਨਿਕ ਟਰੈਵਲ ਆਥੋਰਾਈਜ਼ੇਸ਼ਨ (5“1) ਦੀ ਵਰਤੋਂ ਕਰਕੇ ਯੂਕੇ ਵਿੱਚ ਦਾਖਲ ਨਹੀਂ ਹੋ ਸਕਣਗੇ। ਈ.ਟੀ.ਏ ਸਿਰਫ ਉਨ੍ਹਾਂ ਲੋਕਾਂ ਲਈ ਹੈ ਜਿਨ੍ਹਾਂ ਕੋਲ ਯੂਕੇ ਵਿੱਚ ਰਹਿਣ ਦਾ ਕਾਨੂੰਨੀ ਅਧਿਕਾਰ ਨਹੀਂ ਹੈ। ਬ੍ਰਿਟਿਸ਼ ਨਾਗਰਿਕ ਹੋਣ ਦੇ ਨਾਤੇ, ਤੁਹਾਨੂੰ ਆਪਣੀ ਸਥਿਤੀ ਸਾਬਤ ਕਰਨ ਲਈ ਅਧਿਕਾਰਤ ਦਸਤਾਵੇਜ਼ ਪੇਸ਼ ਕਰਨੇ ਲਾਜ਼ਮੀ ਹੋਣਗੇ।
ਯਾਤਰਾ ਲਈ ਲੋੜੀਂਦੇ ਜ਼ਰੂਰੀ ਦਸਤਾਵੇਜ਼
ਜੇਕਰ ਤੁਸੀਂ 25 ਫਰਵਰੀ 2026 ਤੋਂ ਬਾਅਦ ਯੂਕੇ ਦੀ ਯਾਤਰਾ ਕਰਨ ਦੀ ਯੋਜਨਾ ਬਣਾ ਰਹੇ ਹੋ, ਤਾਂ ਤੁਹਾਡੇ ਕੋਲ ਹੇਠ ਲਿਖੇ ਦਸਤਾਵੇਜ਼ਾਂ ਵਿੱਚੋਂ ਇੱਕ ਦਾ ਹੋਣਾ ਲਾਜ਼ਮੀ ਹੈ: ਮਿਆਦ ਵਾਲਾ ਬਿ੍ਰਟਿਸ਼ ਪਾਸਪੋਰਟ ਜਾਂ ਮਿਆਦ ਵਾਲਾ ਆਇਰਿਸ਼ ਪਾਸਪੋਰਟ।
ਸਰਟੀਫਿਕੇਟ ਆਫ ਐਨਟਾਈਟਲਮੈਂਟ (Certificate of Entitlement): ਜੇਕਰ ਤੁਸੀਂ ਆਪਣੇ ਵਿਦੇਸ਼ੀ ਪਾਸਪੋਰਟ (ਜਿਵੇਂ ਕਿ ਨਿਊਜ਼ੀਲੈਂਡ ਪਾਸਪੋਰਟ) ’ਤੇ ਯਾਤਰਾ ਕਰਨਾ ਚਾਹੁੰਦੇ ਹੋ, ਤਾਂ ਉਸ ਵਿੱਚ ਇਹ ਸਰਟੀਫਿਕੇਟ ਲੱਗਿਆ ਹੋਣਾ ਚਾਹੀਦਾ ਹੈ ਜੋ ਤੁਹਾਡੇ ‘ਰਹਿਣ ਦੇ ਅਧਿਕਾਰ’ (Right of Abode) ਦੀ ਪੁਸ਼ਟੀ ਕਰਦਾ ਹੋਵੇ।
ਸਰਟੀਫਿਕੇਟ ਆਫ ਐਨਟਾਈਟਲਮੈਂਟ: ਫੀਸ ਅਤੇ ਪ੍ਰਕਿਰਿਆ
ਜਿਨ੍ਹਾਂ ਕੋਲ ਬ੍ਰਿਟਿਸ਼ ਪਾਸਪੋਰਟ ਨਹੀਂ ਹੈ, ਉਹ ਇਸ ਸਰਟੀਫਿਕੇਟ ਲਈ ਅਪਲਾਈ ਕਰ ਸਕਦੇ ਹਨ। ਇਸ ਦੀਆਂ ਮੁੱਖ ਸ਼ਰਤਾਂ ਹੇਠ ਲਿਖੇ ਅਨੁਸਾਰ ਹਨ:
ਫੀਸ: ਇਸ ਦੀ ਅਰਜ਼ੀ ਫੀਸ 589 ਪੌਂਡ ਹੈ (ਇਹ ਫੀਸ ਵਾਪਸ ਨਹੀਂ ਕੀਤੀ ਜਾਵੇਗੀ)।
ਸਮਾਂ: ਜੇਕਰ ਤੁਸੀਂ ਯੂ.ਕੇ ਦੇ ਬਾਹਰੋਂ ਅਪਲਾਈ ਕਰਦੇ ਹੋ, ਤਾਂ ਫੈਸਲਾ ਆਉਣ ਵਿੱਚ ਲਗਭਗ 3 ਹਫ਼ਤੇ ਲੱਗਦੇ ਹਨ। ਯੂਕੇ ਦੇ ਅੰਦਰੋਂ ਅਪਲਾਈ ਕਰਨ ’ਤੇ 8 ਹਫ਼ਤੇ ਲੱਗ ਸਕਦੇ ਹਨ।
ਮਿਆਦ: ਜਦੋਂ ਤੁਹਾਡਾ ਵਿਦੇਸ਼ੀ ਪਾਸਪੋਰਟ ਖਤਮ (expire) ਹੋ ਜਾਂਦਾ ਹੈ, ਤਾਂ ਤੁਹਾਨੂੰ ਨਵੇਂ ਪਾਸਪੋਰਟ ਲਈ ਦੁਬਾਰਾ ਸਰਟੀਫਿਕੇਟ ਲੈਣਾ ਪਵੇਗਾ।
ਯਾਤਰੀਆਂ ਲਈ ਵਿਸ਼ੇਸ਼ ਸਲਾਹ
ਨਿਊਜ਼ੀਲੈਂਡ ਦੇ ਵਿਦੇਸ਼ ਮੰਤਰਾਲੇ ਨੇ ਯਾਤਰੀਆਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਆਪਣੀ ਯਾਤਰਾ ਤੋਂ ਕਾਫੀ ਸਮਾਂ ਪਹਿਲਾਂ ਆਪਣੇ ਦਸਤਾਵੇਜ਼ਾਂ ਦੀ ਜਾਂਚ ਕਰ ਲੈਣ। ਜੇਕਰ ਸਰਹੱਦ ’ਤੇ ਸਹੀ ਦਸਤਾਵੇਜ਼ ਪੇਸ਼ ਨਹੀਂ ਕੀਤੇ ਜਾਂਦੇ, ਤਾਂ ਤੁਹਾਨੂੰ ਜਹਾਜ਼ ਜਾਂ ਫੈਰੀ ’ਤੇ ਚੜ੍ਹਨ (boarding) ਤੋਂ ਰੋਕਿਆ ਜਾ ਸਕਦਾ ਹੈ।
ਨੋਟ: ਜੇਕਰ ਤੁਹਾਡਾ ਪਾਸਪੋਰਟ ਗੁੰਮ ਹੋ ਗਿਆ ਹੈ ਅਤੇ ਤੁਸੀਂ ਪਹਿਲਾਂ ਬ੍ਰਿਟਿਸ਼ ਪਾਸਪੋਰਟ ਧਾਰਕ ਸੀ, ਤਾਂ ਤੁਸੀਂ ’ਐਮਰਜੈਂਸੀ ਟਰੈਵਲ ਡੌਕੂਮੈਂਟ’ ਲਈ ਵੀ ਅਪਲਾਈ ਕਰ ਸਕਦੇ ਹੋ।

ਜੇਕਰ ਤੁਹਾਡੇ ਕੋਲ ਸਿਰਫ ਨਿਊਜ਼ੀਲੈਂਡ ਦਾ ਪਾਸਪੋਰਟ ਹੈ ਅਤੇ ਤੁਹਾਡੇ ਕੋਲ ਬ੍ਰਿਟਿਸ਼ ਜਾਂ ਆਇਰਿਸ਼ ਨਾਗਰਿਕਤਾ ਨਹੀਂ ਹੈ, ਤਾਂ ਕੀ ਨਿਯਮ ਹੋਣਗੇ?
ਜੇਕਰ ਤੁਹਾਡੇ ਕੋਲ ਨਿਊਜ਼ੀਲੈਂਡ ਪਾਸਪੋਰਟ ਹੈ ਅਤੇ ਤੁਹਾਡੇ ਕੋਲ ਕੋਈ ਦੋਹਰੀ ਨਾਗਰਿਕਤਾ (ਬ੍ਰਿਟਿਸ਼ ਜਾਂ ਆਇਰਿਸ਼) ਨਹੀਂ ਹੈ ਅਤੇ ਤੁਸੀਂ ਸਿਰਫ ਨਿਊਜ਼ੀਲੈਂਡ ਦੇ ਨਾਗਰਿਕ ਵਜੋਂ ਯੂਕੇ ਜਾ ਰਹੇ ਹੋ, ਤਾਂ ਤੁਹਾਨੂੰ ਇਲੈਕਟ੍ਰਾਨਿਕ ਟਰੈਵਲ ਆਥੋਰਾਈਜ਼ੇਸ਼ਨ (5“1) ਦੀ ਲੋੜ ਪਵੇਗੀ।
ਇਲੈਕਟ੍ਰਾਨਿਕ ਟਰੈਵਲ ਆਥੋਰਾਈਜ਼ੇਸ਼ਨ (ETA) ਕੀ ਹੈ? ਇਹ ਇੱਕ ਡਿਜੀਟਲ ਇਜਾਜ਼ਤ ਹੈ ਜੋ ਉਨ੍ਹਾਂ ਯਾਤਰੀਆਂ ਲਈ ਲਾਜ਼ਮੀ ਹੈ ਜਿਨ੍ਹਾਂ ਨੂੰ ਯੂਕੇ ਜਾਣ ਲਈ ਵੀਜ਼ੇ ਦੀ ਲੋੜ ਨਹੀਂ ਹੁੰਦੀ (ਜਿਵੇਂ ਕਿ ਨਿਊਜ਼ੀਲੈਂਡ ਦੇ ਨਾਗਰਿਕ)।
ਕਦੋਂ ਤੋਂ ਲਾਗੂ? ਨਿਊਜ਼ੀਲੈਂਡ ਦੇ ਨਾਗਰਿਕਾਂ ਸਮੇਤ ਕਈ ਹੋਰ ਦੇਸ਼ਾਂ ਲਈ ਇਹ ਸਿਸਟਮ ਹੁਣ ਪੜਾਅਵਾਰ ਲਾਗੂ ਕੀਤਾ ਜਾ ਰਿਹਾ ਹੈ। 2025-2026 ਤੱਕ ਇਹ ਸਾਰੇ ਗੈਰ-ਵੀਜ਼ਾ ਦੇਸ਼ਾਂ ਦੇ ਯਾਤਰੀਆਂ ਲਈ ਲਾਜ਼ਮੀ ਹੋ ਜਾਵੇਗਾ।
ਯਾਤਰਾ ਦੀ ਮਿਆਦ: ਇੱਕ ਨਿਊਜ਼ੀਲੈਂਡ ਪਾਸਪੋਰਟ ਧਾਰਕ ਵਜੋਂ, ਤੁਸੀਂ ਈ. ਟੀ. ਏ. ਰਾਹੀਂ 6 ਮਹੀਨਿਆਂ ਤੱਕ ਯੂਕੇ ਵਿੱਚ ਸੈਲਾਨੀ ਵਜੋਂ ਰਹਿ ਸਕਦੇ ਹੋ।
ਲਾਗਤ: ਈ.ਟੀ.ਏ. ਦੀ ਫੀਸ ਲਗਭਗ 10 ਪੌਂਡ ਹੈ ਅਤੇ ਇਹ 2 ਸਾਲਾਂ ਦੀ ਮਿਆਦ ਲਈ ਹੁੰਦਾ ਹੈ (ਜਾਂ ਜਦੋਂ ਤੱਕ ਤੁਹਾਡਾ ਪਾਸਪੋਰਟ ਖਤਮ ਨਹੀਂ ਹੋ ਜਾਂਦਾ)।

0

0