ਡਰੱਗਜ਼ ਦੀ ਦੁਨੀਆ ਦਾ ‘ਗੱਬਰ ਸਿੰਘ’, US ਨੇ ਰੱਖਿਆ ਸੀ 50 ਕਰੋੜ ਰੁਪਏ ਦਾ ਇਨਾਮ… ਮੈਕਸੀਕੋ ਦਾ ਕੁਖ਼ਿਆਤ ਅਪਰਾਧੀ ਗ੍ਰਿਫ਼ਤਾਰ

ਉਸ ਦੀ ਗ੍ਰਿਫ਼ਤਾਰੀ ਤੋਂ ਬਾਅਦ ਮੈਕਸੀਕੋ ਦੇ ਕਈ ਇਲਾਕਿਆਂ ਵਿੱਚ ਹਿੰਸਾ ਦੀਆਂ ਘਟਨਾਵਾਂ ਵੀ ਸਾਹਮਣੇ ਆਈਆਂ ਹਨ। ਅਮਰੀਕਾ ਨੇ ਫਲੋਰੇਸ ਸਿਲਵਾ ‘ਤੇ ਕਰੀਬ 5 ਮਿਲੀਅਨ ਡਾਲਰ (ਕਰੀਬ 50 ਕਰੋੜ ਰੁਪਏ) ਦਾ ਇਨਾਮ ਐਲਾਨ ਕੀਤਾ ਹੋਇਆ ਸੀ।

‘ਐਲ ਮੇਂਚੋ’ ਦਾ ਵਾਰਿਸ ਮੰਨਿਆ ਜਾਂਦਾ ਸੀ

ਫਲੋਰੇਸ ਸਿਲਵਾ ਕਾਰਟੇਲ ਦਾ ਰੀਜਨਲ ਕਮਾਂਡਰ ਸੀ ਅਤੇ ਉਸ ਨੂੰ ‘ਐਲ ਮੇਂਚੋ’ ਦਾ ਉੱਤਰਾਧਿਕਾਰੀ ਮੰਨਿਆ ਜਾ ਰਿਹਾ ਸੀ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਸੁਰੱਖਿਆ ਬਲਾਂ ਨੇ ਉਸ ਨੂੰ ਕਿਸੇ ਵੱਡੇ ਟਿਕਾਣੇ ਤੋਂ ਨਹੀਂ, ਸਗੋਂ ਸੜਕ ਕਿਨਾਰੇ ਇੱਕ ਨਾਲੇ ਵਿੱਚ ਲੁਕਿਆ ਹੋਇਆ ਪਾਇਆ। ਐਲ ਮੇਂਚੋ ਦੀ ਮੌਤ ਤੋਂ ਬਾਅਦ ਮੰਨਿਆ ਜਾ ਰਿਹਾ ਸੀ ਕਿ ਉਹੀ ਕਾਰਟੇਲ ਦੀ ਕਮਾਨ ਸੰਭਾਲੇਗਾ, ਪਰ ਉਸ ਦੀ ਗ੍ਰਿਫ਼ਤਾਰੀ ਨਾਲ ਗੈਂਗ ਨੂੰ ਵੱਡਾ ਝਟਕਾ ਲੱਗਾ ਹੈ।

ਅਮਰੀਕੀ ਏਜੰਸੀਆਂ ਅਨੁਸਾਰ, ਇਹ ਕਾਰਟੇਲ ਅਮਰੀਕਾ ਸਮੇਤ 100 ਤੋਂ ਵੱਧ ਦੇਸ਼ਾਂ ਵਿੱਚ ਡਰੱਗਜ਼ ਦਾ ਕਾਰੋਬਾਰ ਕਰਦਾ ਹੈ। ਮੈਕਸੀਕੋ ਦੇ 32 ਵਿੱਚੋਂ 21 ਰਾਜਾਂ ਵਿੱਚ ਇਸ ਦਾ ਨੈੱਟਵਰਕ ਫੈਲਿਆ ਹੋਇਆ ਹੈ।

ਕੌਣ ਹੈ ਫਲੋਰੇਸ ਸਿਲਵਾ?

ਕਰੀਬ 31 ਸਾਲਾ ਔਡੀਆਸ ਫਲੋਰੇਸ ਸਿਲਵਾ ਨੇ ਘੱਟ ਉਮਰ ਵਿੱਚ ਹੀ ਅਫ਼ੀਮ ਦੀ ਖੇਤੀ ਨਾਲ ਡਰੱਗਜ਼ ਦੀ ਦੁਨੀਆ ਵਿੱਚ ਕਦਮ ਰੱਖਿਆ ਸੀ। ਉਹ ਪਹਿਲਾਂ ਵੀ ਅਮਰੀਕਾ ਵਿੱਚ ਗ੍ਰਿਫ਼ਤਾਰ ਹੋ ਚੁੱਕਾ ਹੈ। ਡਰੱਗਜ਼ ਦੀ ਤਸਕਰੀ ਤੋਂ ਇਲਾਵਾ ਉਹ ਜਬਰਨ ਵਸੂਲੀ, ਤੇਲ ਚੋਰੀ ਅਤੇ ਅਗਵਾ ਵਰਗੇ ਅਪਰਾਧਾਂ ਵਿੱਚ ਵੀ ਸ਼ਾਮਲ ਸੀ। ਉਸ ਨੇ ‘ਨਾਇਰਿਤ’ ਇਲਾਕੇ ਨੂੰ ਆਪਣਾ ਗੜ੍ਹ ਬਣਾਇਆ ਹੋਇਆ ਸੀ।

ਫਲੋਰੇਸ ਸਿਲਵਾ ਨੂੰ ‘ਐਲ ਜਾਰਡੀਨੇਰੋ’ ਨਾਂ ਉਸ ਦੇ ਸ਼ੁਰੂਆਤੀ ਦਿਨਾਂ ਕਰਕੇ ਮਿਲਿਆ, ਜਦੋਂ ਉਹ ਅਫ਼ੀਮ ਅਤੇ ਮਾਰਿਜੁਆਨਾ (ਗਾਂਜਾ) ਦੀ ਖੇਤੀ ਕਰਵਾਉਂਦਾ ਸੀ। ਅਮਰੀਕੀ ਸਰਕਾਰ ਨੇ ਉਸ ਨੂੰ ਖ਼ਤਰਨਾਕ ਡਰੱਗ ਤਸਕਰ ਐਲਾਨ ਕਰਕੇ ਉਸ ਦੀਆਂ ਜਾਇਦਾਦਾਂ ਵੀ ਜ਼ਬਤ ਕਰ ਲਈਆਂ ਸਨ।

ਅਮਰੀਕਾ 2021 ਤੋਂ ਹੀ ਉਸ ਨੂੰ ਫੜਨ ਦੀ ਕੋਸ਼ਿਸ਼ ਕਰ ਰਿਹਾ ਸੀ ਅਤੇ ਮੈਕਸੀਕੋ ‘ਤੇ ਦਬਾਅ ਬਣਾ ਰਿਹਾ ਸੀ। ਉਸ ‘ਤੇ ਕੋਲੰਬੀਆ ਤੋਂ ਅਮਰੀਕਾ ਤੱਕ ਨਸ਼ਾ ਤਸਕਰੀ ਦੇ ਕਈ ਮਾਮਲੇ ਦਰਜ ਹਨ।

ਗ੍ਰਿਫ਼ਤਾਰੀ ਤੋਂ ਬਾਅਦ ਵਧਿਆ ਤਣਾਅ

ਦੋ ਮਹੀਨੇ ਪਹਿਲਾਂ ‘ਐਲ ਮੇਂਚੋ’ ਦੀ ਮੌਤ ਤੋਂ ਬਾਅਦ ਪੂਰੇ ਮੈਕਸੀਕੋ ਵਿੱਚ ਹਿੰਸਾ ਭੜਕ ਗਈ ਸੀ। ਹੁਣ ਫਲੋਰੇਸ ਸਿਲਵਾ ਦੀ ਗ੍ਰਿਫ਼ਤਾਰੀ ਤੋਂ ਬਾਅਦ ਵੀ ‘ਨਾਇਰਿਤ’ ਰਾਜ ਵਿੱਚ ਅਗਜ਼ਨੀ ਦੀਆਂ ਘਟਨਾਵਾਂ ਸਾਹਮਣੇ ਆਈਆਂ ਹਨ। ਹਾਲਾਂਕਿ, ਉਸ ਦੀ ਗ੍ਰਿਫ਼ਤਾਰੀ ਦੌਰਾਨ ਕਿਸੇ ਦੇ ਜ਼ਖਮੀ ਹੋਣ ਦੀ ਖ਼ਬਰ ਨਹੀਂ ਹੈ ਅਤੇ ਇਸ ਨੂੰ ਸੁਰੱਖਿਆ ਏਜੰਸੀਆਂ ਦੀ ਵੱਡੀ ਸਫਲਤਾ ਮੰਨਿਆ ਜਾ ਰਿਹਾ ਹੈ।