ਯੂਰਪ ਦੇ ਵੱਡੇ ਹਵਾਈ ਅੱਡਿਆਂ ‘ਤੇ ਸਾਈਬਰ ਅਟੈਕ, ਹੀਥਰੋ ਤੇ ਬ੍ਰਸਲਜ਼ ਸਮੇਤ ਕਈ ਏਅਰਪੋਰਟ ‘ਤੇ ਉਡਾਣਾਂ ਬੰਦ

ਕੋਲਿਨਸ ਏਅਰੋਸਪੇਸ ਦੁਨੀਆ ਭਰ ਦੇ ਹਵਾਈ ਅੱਡਿਆਂ ‘ਤੇ ਕਈ ਏਅਰਲਾਈਨਜ਼ ਲਈ ਸਿਸਟਮ ਦਿੰਦੀ ਹੈ ਤੇ ਇਸ ਵਿਚ ਇਕ ਤਕਨੀਕੀ ਸਮੱਸਿਆ ਆ ਰਹੀ ਹੈ, ਜਿਸ ਕਾਰਨ ਡਿਪਾਰਚਰ ਵਾਲੇ ਯਾਤਰੀਆਂ ਨੂੰ ਦੇਰੀ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ। ਇਸ ਤੋਂ ਬਾਅਦ ਹੀਥਰੋ ਹਵਾਈ ਅੱਡੇ ਨੇ ਦੇਰੀ ਦੀ ਚਿਤਾਵਨੀ ਜਾਰੀ ਕੀਤੀ ਸੀ। ਬ੍ਰਸਲਜ਼ ਹਵਾਈ ਅੱਡਾ ਤੇ ਬਰਲਿਨ ਹਵਾਈ ਅੱਡਾ ਵੀ ਵੱਖ-ਵੱਖ ਬਿਆਨਾਂ ‘ਚ ਇਸ ਹਮਲੇ ਤੋਂ ਪ੍ਰਭਾਵਿਤ ਹੋਣ ਦੀ ਪੁਸ਼ਟੀ ਕਰ ਚੁੱਕੇ ਹਨ।

ਚੈਕ-ਇਨ ‘ਚ ਆ ਰਹੀ ਸਮੱਸਿਆ

ਕੋਲਿਨਸ ਏਅਰੋਸਪੇਸ ਦੀ ਮੂਲ ਕੰਪਨੀ ਆਰਟੀਐਕਸ ਨੇ ਬਿਨਾਂ ਕਿਸੇ ਦਾ ਨਾਂ ਲਏ ਇਹ ਜਾਣਕਾਰੀ ਦਿੱਤੀ ਹੈ ਕਿ ਉਸਨੂੰ ਚੋਣਵੇਂ ਹਵਾਈ ਅੱਡਿਆਂ ‘ਤੇ ਆਪਣੇ ਸਾਫਟਵੇਅਰ ‘ਚ ਸਾਈਬਰ ਸੰਬੰਧੀ ਰੁਕਾਵਟਾਂ ਦਾ ਪਤਾ ਲੱਗਾ ਹੈ। ਇਲੈਕਟ੍ਰੌਨਿਕ ਚੈਕ-ਇਨ ਪ੍ਰਭਾਵਿਤ ਹੋਇਆ ਹੈ। ਆਰਟੀਐਕਸ ਨੇ ਇਕ ਈਮੇਲ ਬਿਆਨ ‘ਚ ਕਿਹਾ, “ਇਸਦਾ ਅਸਰ ਇਲੈਕਟ੍ਰੌਨਿਕ ਗਾਹਕ ਚੈਕ-ਇਨ ਅਤੇ ਸਾਮਾਨ ਛੱਡਣ ਤਕ ਸੀਮਤ ਹੈ ਅਤੇ ਇਸਨੂੰ ਮੈਨੁਅਲ ਚੈਕ-ਇਨ ਪ੍ਰਕਿਰਿਆਵਾਂ ਰਾਹੀਂ ਘਟਾਇਆ ਜਾ ਸਕਦਾ ਹੈ।” ਇਸਦੇ ਨਾਲ ਹੀ, ਉਨ੍ਹਾਂ ਇਹ ਵੀ ਦੱਸਿਆ ਕਿ ਉਹ ਇਸ ਸਮੱਸਿਆ ਨੂੰ ਜਲਦੀ ਤੋਂ ਜਲਦੀ ਸੁਧਾਰਨ ਲਈ ਕੰਮ ਕਰ ਰਹੇ ਹਨ।

ਬ੍ਰਸਲਜ਼ ਹਵਾਈ ਅੱਡੇ ਨੇ ਆਪਣੀ ਵੈਬਸਾਈਟ ‘ਤੇ ਕਿਹਾ ਕਿ ਇਸ ਹਮਲੇ ਕਾਰਨ ਆਟੋਮੈਟਿਕ ਪ੍ਰਣਾਲੀਆਂ ਨਕਾਰਾ ਹੋ ਗਈਆਂ ਹਨ, ਤੇ ਸਿਰਫ ਮੈਨੁਅਲ ਚੈਕ-ਇਨ ਤੇ ਬੋਰਡਿੰਗ ਪ੍ਰਕਿਰਿਆ ਹੀ ਸੰਭਵ ਹੈ। ਉਨ੍ਹਾਂ ਇਹ ਵੀ ਦੱਸਿਆ ਕਿ ਇਹ ਘਟਨਾ ਸ਼ੁੱਕਰਵਾਰ ਰਾਤ ਨੂੰ ਵਾਪਰੀ ਸੀ।