ਜਲੰਧਰ ਦੇ ਸੱਤ ਸੈਲਾਨੀ ਖੱਡ ’ਚ ਫਸੇ, ਫਾਇਰ ਬ੍ਰਿਗੇਡ ਵਿਭਾਗ ਨੇ ਸੁਰੱਖਿਅਤ ਬਚਾਏ; ਪਾਲਮਪੁਰ ‘ਚ ਟਲਿਆ ਵੱਡਾ ਹਾਦਸਾ

ਪਾਲਮਪੁਰ :TLT NEWS/ ਪਾਲਮਪੁਰ ਦੇ ਨੇੜੇ ਬੰਦਲਾ ਖੇਤਰ ’ਚ ਸ਼ਨਿੱਚਰਵਾਰ ਨੂੰ ਨਿਊਗਲ ਖੱਡ ’ਚ ਵੱਡਾ ਹਾਦਸਾ ਟਲ ਗਿਆ। ਖੱਡ ’ਚ ਪਾਣੀ ਦਾ ਪੱਧਰ ਵਧਣ ਤੇ ਟੈਂਪਰੇਰੀ ਪੁਲ ਦੇ ਵਹਿਣ ਨਾਲ ਪੰਜਾਬ ਦੇ ਜਲੰਧਰ ਤੋਂ ਆਏ ਸੱਤ ਸੈਲਾਨੀ ਉਥੇ ਫਸ ਗਏ। ਇਸ ਬਾਰੇ ਸੂਚਨਾ ਮਿਲਦੇ ਹੀ ਫਾਇਰ ਬ੍ਰਿਗੇਡ ਵਿਭਾਗ ਪਾਲਮਪੁਰ ਦੀ ਟੀਮ ਨੇ ਅਸਥਾਈ ਪੁੱਲ ਬਣਾ ਕੇ ਸਾਰਿਆਂ ਨੂੰ ਸੁਰੱਖਿਅਤ ਕੱਢ ਲਿਆ। ਬਚਾਅ ਮੁਹਿੰਮ ਲਗਪਗ ਇਕ ਘੰਟੇ ਤੱਕ ਚੱਲੀ।ਜਲੰਧਰ ਤੋਂ ਆਏ ਇਹ ਸੈਲਾਨੀ ਪਿਛਲੇ ਦੋ ਦਿਨਾਂ ਤੋਂ ਖੱਡ ਕੋਲ ਸਥਿਤ ਕੈਫੇ ’ਚ ਠਹਿਰੇ ਸਨ। ਸ਼ਨੀਵਾਰ ਦੁਪਹਿਰ ਨੂੰ ਉਹ ਖੱਡ ’ਚ ਮਸਤੀ ਕਰਨ ਗਏ ਸਨ ਕਿ ਅਚਾਨਕ ਪਾਣੀ ਦਾ ਪੱਧਰ ਵਧ ਗਿਆ। ਇਸ ਨਾਲ ਉਥੇ ਬਣੀ ਟੈਂਪਰੇਰੀ ਪੁਲੀਆ ਵੀ ਰੁੜ ਗਈ ਤੇ ਖੱਡ ਵਿਚਾਲੇ ਦੋ ਮਰਦ, ਤਿੰਨ ਔਰਤਾਂ ਤੇ ਦੋ ਬੱਚੇ ਫਸ ਗਏ। ਦੱਸਿਆ ਜਾ ਰਿਹਾ ਹੈ ਕਿ ਹਾਈਡਲ ਪ੍ਰੋਜੈਕਟ ਵੱਲੋਂ ਪਾਣੀ ਛੱਡਣ ਦੌਰਾਨ ਸਾਇਰਨ ਵੀ ਵਜਾਇਆ ਗਿਆ ਸੀ ਪਰ ਸੈਲਾਨੀ ਇਸ ਨੂੰ ਸਮਝ ਨਹੀਂ ਸਕੇ ਤੇ ਉਹ ਖੱਡ ’ਚ ਫਸ ਗਏ।

0

0